قصيدتي كلها ساعتين ويدن منذ العام ٢٠٠٧ والأصدقاء يطلبونها مني في كل ندوة مما أوقع ظلما شديدا على باقي شعري
كلها ساعتين ويدن
كلها ساعتين ويدَّنْ
والا أقولك قوم وصلِّي
اللي راح يحصل حصل لي
واللي راح يدن إقامة
واللي مُوكَل بالإمامة
واللي راح يرفع جنابَة
زاد على المُحْدِث جنابة
قلبي يا مرمى نيران المدفعية
بعترت فيّا الديابة
أهدروا دمي الجُناة
مش غريبة الحق تاه
زووم ودندن
مش غريبة القسوة تلبس طقم رِقّة
مش غريبة ان المشقّة:
تلقى دَقّة وصحن فول
تلقى عود جرجير
في شقّة عيش حكاية
مش غريبة:
إن الخرابة اللي نازل فيها قبر
مش غريبة:
القبر أحضان الحبايب
والصحاب
كلهم طالبين رقبتك
مش غريب قدِّمت سبتك
ما التقتش الحدّ جاي
مش غريبة إن قلت جاي
بعد عسر اليسر ماطل
مش غريبة:
إن الأمل ع القهوه عاطل
دخَّلوه قلب الجريمة
النوايا مش سليمة
والنخيل طارح رصاص
كل خصم زيادة منك
للصوص وبشكل خاص
خاص بزيادة ف رصيدهم
وإنته صيدهم
ف الشبك مانتاش قاصدهم
بس ليهم
خصم منك
غصب عنك ف النهاية
لأمر واقع بيك هترضخ
لو قالو لك : بخ !
تغطس في الهدوم
الكلام مالهوش لزوم
زوم ودندن
قول : آمين
إدخلوا بنا سالمين
ف الحريقة
ضيقة بعد الضيقة زوم
مش غريبة
مش غريبة الكل شاعر
مش غريبة الكل قاص
مش غريبة ف ميكروباص
مجرمين عاملين تناص
ويا صرخة جوع ولادي
الشباعى يئنو باسم الفقرا عادي
الصلاة يؤمُّونا فيها المجرمين ..
ويقولوا : سووا الصف !
عادي
ع المنابر ينصحونا
بتقوى رب الخلق عادي
مش غريبة إن المعادي
تستلم من شبرا كسوة
مش غريبة ان الزكاة ..
من تحت تطلع فوق بقسوة
مش غريبة
مش غريبة:
إنك بتسأل عني ..
قاعد ليه ما بينكم
إعتبرني حَدّ منكم
أي حاجة في أي حتة
إعتبرني ف هيصة جِتّة
أو جاكته ببنطلون
أو جاكته بدون مؤاخذة
الحياة دي الوقت
آخذه في التعرِّي
مش ها قول : قال المعري
مش ها قول : قال ابن إيه ..
الكلام وقف
لجناب المخبر الفلتة السفيه
الحقيقة الحق متّاخد تحري
واللي له حق اشتباه
مش غريبة الكل تاه
كلها ساعتين ويدن….
#مصباح_المهدي
